Udhëheqësi autoritar i Bjellorusisë, Aleksandr Lukashenko, tha se vendimi i Lituanisë për të mbyllur kufirin me Bjellorusinë është një “mashtrim i pabesueshëm”, duke e akuzuar Vilniusin se po zhvillon luftë hibride. Kryeministrja e Lituanisë, Inga Ruginiene, tha të hënën se vendi i saj do të rrëzojë balonat me cigare kontrabandë që vijnë nga kufiri me Bjellorusinë dhe që herë pas here kanë ndërprerë trafikun ajror në shtetin baltik duke cuar në mbylljen e aeroporteve. Agjencia shtetërore e lajmeve në Bjellorusi, BELTA, citoi Lukashenkon të thoshte se Lituania ka gjetur një justifikim absurd, sic janë këto balona, për të mbyllur kufirin. Tregu i zi i duhanit është një burim i rëndësishëm i të ardhurave për qeverinë e Lukashenkos, sipas opozitës bjelloruse. Disa persona janë arrestuar në Lituani ndërsa po përpiqeshin që të merrnin cigaret që ishin vendosur në balona në incidentin e javës së kaluar. Ky incident shtyu autoritetet në Lituani që të mbyllnin aeroportet. Lëshimin e balonave me mallra kontrabandë, Lituania vetë e ka cilësuar si “luftë hibride”.