Balona që mbanin mijëra pako cigaresh kanë ndërprerë fluturimet në Lituani, pasi Aeroporti i Vilniusit u detyrua të mbyllej për orë të tëra kur dhjetëra prej tyre fluturuan në hapësirën ajrore të vendit. Qendra Kombëtare e Menaxhimit të Krizave i tha BBC-së se u zbuluan 25 balona meteorologjike që hynin në Lituani nga Bjellorusia fqinje, dy prej të cilave përfunduan direkt mbi aeroport. Aeroporti tha se mbyllja çoi në anulimin e 30 fluturimeve që prekën 6,000 pasagjerë. Ai paralajmëroi se mund të ketë ende vonesa të hënën. "Shkeljet e hapësirës ajrore" vijnë në një kohë tensioni të shtuar në Evropë pasi një numër ndërhyrjesh me dronë, që dyshohet se kanë lidhje me Rusinë, shkaktuan ndërprerje të trafikut ajror. Moska ka mohuar çdo përfshirje në incidentet e fundit. Deri në 14 nga balonat e lëshuara gjatë fundjavës fluturuan mbi zonën e Vilniusit, kryeqyteti i Lituanisë dhe afër kufirit me Bjellorusinë, thanë zyrtarët lituanezë. Të paktën 11 balona që mbanin 18,000 pako cigaresh që do të shiteshin në tregun e zi janë rikuperuar që atëherë, megjithëse ky numër mund të rritet, tha Shërbimi Shtetëror i Rojës Kufitare të Lituanisë. Pavarësisht ndërprerjeve që shkaktuan, Balonat me ngarkesë kontrabandë nga Bjellorusia, nuk janë asgjë e re në Lituani, Letoni dhe Poloni. Deri më tani këtë vit, 544 balona janë regjistruar duke hyrë në Lituani nga Bjellorusia ndërsa 966 ishtë ky numër vitin e kaluar. Ndërkohë, rajoni verilindor Podlaskie i Polonisë, i cili kufizohet gjithashtu me Bjellorusinë, ka regjistruar më shumë se 100 raste në të cilat kontrabanda vjen nga vendi fqinj duke përdorur balonat.