Zgjedhjet e pranverës së vitit të ardhshëm janë cështja që po ndez debat në politikën shqiptare. Kodi Zgjedhor që duhet votuar sipas ndryshimeve kushtetuese, propozimet e partive politike për të, përbërja e KQZ, por edhe lista e zgjedhësve janë disa prej pikëpyetjeve që presin përgjigje. Njërës prej pyetjeve dhe që lidhet me listën e zgjedhësve i ka dhënë përgjigje ministri i brendshëm Sandër Lleshaj. Në bazë të detyrimeve të Kodit Zgjedhor, ekstrakti i parë i listës së zgjedhësve do të publikohet pas disa ditësh, saktësisht më datën 5 tetor 2020, dhe të gjithë do kenë mundësinë të verifikojnë këtë të vërtetë të thjeshtë. Nga verifikimet paraprake të pretendimeve të bëra publike nga disa media nën ndikim, rezulton se qytetarët e paraqitur si votues të djathtë dhe të përdorur për të ilustruar mashtrimin publik kanë thënë të pa vërteta. Por për këtë do të ketë më shumë hollësi në ditët në vijim pasi të thellohen më tej verifikimet përkatëse. Duke folur për disa lajme që janë publikuar në media, lidhur me ndryshimin e qendrave të votimit, ministri i cilësoi mashtrime, teksa iu referua edhe problematikës së sistemit të adresave dhe një pakete ligjore në të ardhmen për sistemimin përfundimtar të tyre.