Ish-presidenti Ilir Meta ka gati listën me dëshmitarët që do të thërrasë në procesin që GJKKO po zhvillon në themel ndaj ish-çiftit presidencial, nën akuzë për korrupsion, pastrim parash dhe fshehje pasurie. Në seancën e djeshme që zgjati rreth 7 orë, mbrojtja e Ilir Metës kërkoi thirrjen e ekspertëve dhe të dëshmitarëve. Ish presidenti kërkon si dëshmitar edhe kryeministrin Edi Rama, Gramoz Rucin dhe Taulant Ballën që duhet të rrëfejnë se si kaloi ligji i minierave. Sipas Metës, dëshmitarët do të provojë që ai si kryetar parlamenti i kohës nuk ka patur asnjë ndikim tek asnjëri prej tyre, ndryshe nga sa pretendon SPAK. Në listë përfshihen ish bashkëpunëtorët e metës në LSI, ish deputetë si dhe dhjetëra shtetas të huaj që do duhet të dëshmojnë lidhur me ccështjen e lobimit në SHBA, por edhe CEZ-DIA. Brenda kësaj liste është edhe emri i Donald Lu, ish ambasadori i SHBA-së në Shqipëri. Avokati Cakrani përmendi në seancën e të mërkurës një intervistë të ambasadorit të kohës, i cili pranon që Meta udhëtonte shpesh në SHBA. Kjo tregon sipas avokatit që Meta nuk kishte nevojë për lobime.