Ushtria izraelite tha se ka shpëtuar dy pengje gjatë një operacioni të zhvilluar në orët e para të së hënës, duke shënuar një sukses të vogël, por me rëndësi simbolike, në përpjekjen e saj për të liruar mbi 100 pengje që besohet se po mbahen nga Hamasi. Zyrtarë nga ministria e shëndetësisë në Gaza, e drejtuar nga Hamasi, thanë se të paktën 48 palestinezë ishin vrarë në sulme, ndërsa të tjerë folën për rreth 100 viktima. Operacioni u krye në Rafah, qytet në cepin jugor të Rripit të Gazës ku 1.4 milion palestinezë janë zhvendosur për t’i shpëtuar luftimeve mes Izraelit dhe Hamasit në pjesën tjetër të territorit. Zëdhënësi i ushtrisë izraelite, Daniel Hagari, tha se pengjet po mbaheshin në katin e dytë të një banese në Rafah, dhe po ruheshin nga pjesëtarë të armatosur të Hamasit, që gjendeshin si në banesë, por edhe në ndërtesat përreth. Hagari tha se njësitë speciale hynë në ndërtesë, mes shkëmbimit të zjarrit, në orën 01:49 minuta të së hënës, dhe një minutë më vonë, ushtria izraelite kreu sulme ajrore në zonat përreth. Ai tha se anëtarët e ekipit të shpëtimit mbrojtën pengjet me trupat e tyre ndërsa u zhvillua një betejë e ashpër me shumë luftëtarë të Hamasit. Sipas Dr.Marëan al-Hams, drejtor i spitalit Abu Youssef al-Najjar, në mesin e të vrarëve nga sulmet izraelite në Rafah kishte gra dhe fëmijë. Ndërkaq, pengjet e shpëtuara u dërguan në një “zonë të sigurt” aty afër dhe iu nënshkruan një kontrolli të shpejtë mjekësor para se të dërgoheshin në një spital në Izraelin qendror. Izraeli e ka përshkruar Rafahun si bastionin e fundit të mbetur të Hamasit në Gazë dhe ka sinjalizuar se një ofensivë tokësore shumë shpejt do të shënjestrojë këtë qytet të tejmbushur me palestinezë.