Ish kryeprokurori i Vlorës, Aurel Zarka është liruar nga Gjykata e Posaçme e Apelit, pasi ka shlyer dënimin për dosjen “Toyota Auris”. I arrestuar që në qershor të 2024, një vit më parë GJKKO e dënoi Zarkën me 4 vite burg, nën akuzat e korrupsionit dhe ushtrimi i ndikimit të paligjshëm. Me gjykim të shkurtuar ai u dënua përfundimisht me 2 vite e 8 muaj burg, ndërsa pati edhe dënim plotësues me 5 vite jashtë funksioneve publike. Hetimet ndaj Zarkës dhe të pandehurve të tjerë u nisën bazuar në të dhënat e administruara nga aplikacionet SKY ECC. Të pandehurit në bashkëpunim me njëri-tjetrin, në disa raste, kanë ofruar dhe kanë premtuar përfitime të parregullta për të ushtruar ndikim te funksionarë të drejtësisë. Sipas prokurorit që hetoi çështjen e Aurel Zarkës, ky i fundit ka komunikuar në Sky Ecc me ish oficeren Erjola Daupaj për të ndërhyrë për fatin e dosjes “Toyota Auris” si dhe në dy çështje të tjera në qytetin e Vlorës. Hetimi për dosjen e njohur si “Toyota Auris”, u regjistrua pas bllokimit në portin e Durrësit, në qershor të vitit 2018, të 3.4 milionë eurove ‘cash’ të fshehura në dy makina të përdorura dhe të importuara nga Belgjika.