Ish-kryebashkiaku i Fushë-Arrëzit Fran Tuci, i dënuar për shpërdorim detyre së bashku me dy bashkëpunëtorët e tij Durim Margjekaj dhe Ndoc Marku është liruar nga qelia. Tuci ka shlyer dënimin me 1 vit e 6 muaj me kohën e qëndrimit në paraburgim. Për këtë arsye GJKKO pranoi kërkesën e avokatëve për shuarjen e dënimit. Sipas SPAK, nga hetimet ka rezultuar se në territorin e Bashkisë Fushë-Arrëz, në kundërshtim me kuadrin ligjor në fuqi, është hapur segmenti i ri rrugor, i cili ka cenuar një sipërfaqe të konsiderueshme të fondit pyjor në pronësi të kësaj Bashkie si edhe ka dëmtuar rëndë terrenin. Nga veprimet hetimore ka rezultuar e provuar se ish-kryebashkiaku i Fushë Arrëzit, në bashkëpunim më ish-Administratorin e Njësisë Administrative Iballë, me veprime dhe mosveprime në kundërshtim me ligjin kanë lejuar hapjen e këtij segmenti të ri rrugor, të pamiratuar më parë nga autoritetet kompetente. Vetë Tuci ka pretenduar më parë se ky segment rrugor i është kërkuar nga qytetarët e zonës.