Rreth 1 milion euro të padeklaruara janë sekuestruar në pikën kufitare të Merdarës, që lidh Kosovën me Serbinë. Lajmi u konfirmua nga Dogana e Kosovës, e cila bëri me dije se automjeti u përzgjodh për kontroll të detajuar bazuar në analizën e riskut. Burime për Top Channel bëjnë me dije se mes tre të ndaluarve për këtë ngjarje është edhe një polic nga Tirana. Bëhet fjalë për Aurel Kazia, efektiv pranë komisariatit nr.5 në kryeqytet. Ndërkaq, sipas njoftimit të autoriteteve në Kosovë, fillimisht mjeti është kontrolluar me skaner me rreze X, ku është evidentuar një hapësirë të modifikuar në dysheme. Pas kësaj, është kërkuar asistencë nga zyrtarët e Policisë Kufitare, të cilët kanë përdorur pajisje fibroskopike për kontroll më të thelluar. Gjatë kontrollit të përbashkët janë zbuluar paratë e fshehura në hapësirën e improvizuar brenda automjetit. Sipas vlerësimeve paraprake, shuma arrin rreth 1 milion euro.