Kryeministri izraelit, Benjamin Netanyahu, tha se shpreson të bëjë të ditur shpejt lirimin e pengjeve që po mbahen në Gazë. Përmes një deklarate në televizion, ai theksoi se “Hamasi do të çarmatoset dhe Gaza do të çmilitarizohet, qoftë përmes rrugës së lehtë apo të vështirë, por kjo do të arrihet”. Këto komente erdhën pasi Hamasi e lëshoi një deklaratë të premten, ku tha se është pajtuar për t’ë liruar pengjet, sipas planit amerikan për paqe, por nuk e ka përmendur çarmatimin dhe ka kërkuar të negociojë disa pika. Hamasi tha të shtunën se Izraeli po vazhdon të kryejë “masakra” pasi ka goditur Gazën që herët në mëngjes, dhe bëri thirrje për presion global ndaj Izraelit. Bisedimet indirekte për armëpushim pritet të nisin të hënën në Egjipt. Presidenti amerikan, Donald Trump tha se “nuk do të tolerojë vonesa” nga Hamasi për respektimin e marrëveshjes. Ai tha më vonë se Izraeli “është pajtuar për fazën fillestare të tërheqjes”, që duket se është referencë për largimin e trupave ushtarake, sipas planit amerikan. Plani prej 20 pikash propozon përfundimin e luftimeve dhe lirimin e 20 pengjeve të gjalla izraelite të mbajtura nga Hamasi, si dhe trupat e pengjeve tjera që kanë vdekur, në këmbim të qindra palestinezëve që mbahen në burgjet izraelite. Autoritetet palestineze kanë raportuar për sulme izraelite në Gaza të shtunën, pavarësisht se Trumpi i tha Izraelit që t’i ndalë menjëherë bombardimet. Ministria e Shëndetësisë në Gaza tha se 66 persona u vranë nga operacionet ushtarake izraelite në 24 orët e fundit.