Vdekshmëria foshnjore në vendin tonë ka hyrë në një trend me rritje të lartë vitet e fundit, teksa numri i lindjeve po pëson një rënie të mprehtë. Sipas të dhënave zyrtare të raportuara nga INSTAT, vitin e kaluar kishim më pak lindje, teksa humben jetën 293 foshnja, prej të cilave 57 për qind ishin djem. Po sipas te dhenave zyrtare, në vitin 2018 mbi 38 për qind e bebeve e humbën betejën me jetën si pasojë e ndërlikimeve që nënat kishin gjatë barrës, që ndikuan në shëndetin e foshnjave pas lindjes. Studime më te hershme të Institutit të Shëndetit Publik kanë gjetur se, shumica e vdekshmërisë foshnjore ndodh në zonat rurale në prindër me arsim të ulët. Mjekët gjinekologë pohojnë se ndërlikimet e barrës tek nënat po vijnë në rritje si gjithë sëmundjet e tjera. Stili i jetesës dhe dieta kanë bërë që shumë gra të përjetojnë gjatë shtatzënisë diabet dhe hipertension. Shqipëria po bën hapa prapa në indeksin e zhvillimit njerëzor për shkak se vdekshmëria foshnjore po rritet vit pas viti dhe nga ana tjetër shëndeti i popullatës po përkeqësohet, duke rritur jetët e humbura në mosha të reja.