Arabia Saudite dhe rebelët Huthi të Jemenit, të mbështetur nga Irani, shkëmbyen sulme të reja përgjatë kufirit të tyre ndërsa jemenasit hipën mbi varka në Detin e Kuq për t'u larguar nga luftimet, në një kohë kur përhapja e luftës në Lindjen e Mesme ka krijuar kërcënime të reja për furnizimet globale me naftë. Televizioni i kontrolluar nga Huthit raportoi për sulme ajrore saudite në provincën Hajjah, pranë kufirit saudit dhe bregdetit të Detit të Kuq, si dhe në zonën përreth Taiz-it, më në brendësi të vendit, në jug. Mbrojtja Civile e Arabisë Saudite njoftoi se një jemenas që jetonte në Arabinë Saudite kishte humbur jetën nga mbetjet e një droni të kapur mbi qytetin perëndimor të Taif-it dhe kjo është viktima e parë e konfirkuar nga Riadi gjatë sulmeve të përsëritura të Huthive që nga përshkallëzimi i luftimeve javën e kaluar. Më herët, autoritetet kishin raportuar se mbi 80 persona ishin plagosur. Në anën tjetër, forcat Detare të Gardës Revolucionare të Iranit njoftuan se një cisternë nafte me flamur të Togos mori flakë pasi u godit ndërsa po përpiqej të kryente atë që e quajtën një "kalim të paligjshëm" përmes Ngushticës së Hormuzit, raportuan mediat shtetërore iraniane. Cisterna ndaloi së lëvizuri pas zjarrit, sipas Gardës. Përhapja e luftës në Jemen dhe Arabinë Saudite ka ngritur shqetësime të reja lidhur me furnizimet me naftë, duke rrezikuar rrugën kryesore alternative përmes Detit të Kuq për eksportet e Gjirit, ndërkohë që qarkullimi përmes Ngushticës së Hormuzit mbetet i kufizuar. Presidenti amerikan Donald Trump ka refuzuar kërkesat e sauditëve për mbështetje ushtarake në luftën kundër Huthive, të cilët ranë dakord për një armëpushim me Shtetet e Bashkuara vitin e kaluar, pasi Uashingtoni e kishte bombarduar grupin për dy muaj. Presidenti përballet me mundësinë e humbjeve politike për Partinë e tij Republikane në zgjedhjet e mesit të nëntorit, pjesërisht për shkak të çmimeve më të larta të energjisë që pasuan sulmet e Shteteve të Bashkuara dhe Izraelit ndaj Iranit në muajin shkurt. Të enjten, Trump deklaroi se ndodhet para një vendimi kritik lidhur me mundësinë e rifillimit të sulmeve masive ndaj Iranit. "Kam një vendim të rëndësishëm për të marrë. A dua të ndërhyj dhe t'i asgjësoj ata, apo jo? Është një vendim i madh. Gjithçka mund të ndodhë", tha Trump për Axios.