Presidenti i Republikës, Ilir Meta, ka kthyer në Kuvend për rishqyrtim ligjin “Për pronat e paluajtshme të shtetit”, të ndryshuar”. Ky ligj, në mënyrë të pashpjeguar dhe arsyetuar është shqyrtuar me urgjencë brenda 7 ditëve nga Kuvendi – thotë presidenti në njoftimin zyrtar. Nisma që paraqitet si ndërhyrje në legjislacionin në fuqi për forcimin e mekanizmave ligjorë për mbrojtjen e interesit dhe pasurisë publike, në fakt rrezikon të shkaktojë një problematikë në raport me të drejtën e gëzimit dhe posedimit të pronës sipas titujve të fituar të pronësisë. E vetmja çështje që duket se ka marrë vëmendjen më të madhe të qeverisë dhe Kuvendit është rregullimi i marrëdhënieve juridike që shteti ka lidhur apo do të mund të lidhë me persona të tretë për përdorimin e pasurisë pronë publike, tashmë edhe pa një afat të përcaktuar – argumenton kreu i shtetit.