Zgjidhje për një situatë absurditeti. Kështu e konsideron kryeministri Edi Rama, ligjin për portet turistike, miratuar pak kohë më parë mes debateve në parlament, me opozitën që ngrinte shqetësimin se ky ligj jep pa garë marinat turistike për investitorët strategjikë, dhe delegacionin e Bashkimit Europian në Tiranë që shprehej se do monitorohet zbatimi i këtij ligji në pikëpamje të transparencës në fushën e prokurimeve publike. Sinkron Rama: “Ne kemi bërë një ndryshim të vetëm për të hequr mundësinë e një pasoje absurde. Ndryshimi nuk lidhet me portet turistike ne tërësi, nuk lidhet fare me garat, fare, zero, hiç gjëkundi. Ndryshimi që kemi bërë, lidhet vetëm me rastet kur dikush investon për një resort turistik dhe do të bëjë dhe një marinë dhe me ligjin e pandryshuar për marinën që dikush do të bëjë pranë resortit të tij duhet garë që të vijë një tjetër dhe të fillojë një sherr që të mos mbarojë kurrë. E kuptoni?” Sa i takon rezervave të delegacionit të Bashkimit Europian se në këto ndryshime ligjore ndërthurreshin edhe dispozitat e ligjit të investitorëve strategjikë, që do të duhet të shfuqizohet si parakusht për mbylljen e kapitullit 27, kryeministri Edi Rama dha këtë përgjigje.