Gjykata Kushtetuese pranoi pjesërisht kërkesën e opozitës për ligjin e Komisioneve Hetimore. Trupi gjykues vendosi të rrëzojë katër nga nëntë nenet e miratuara nga ana e mazhorancës, duke argumentuar se në disa raste nuk garantohet e drejta e pakicës parlamentare. Por nga ana tjetër, gjykata thotë gjithashtu se ka paqartësi edhe sa I takon balancimit të pushteteve. Shumica socialiste kishte parashikuar tre raste kur ngrihen komisionet hetimore: çështja të ketë të bëjë me funksionin legjislativ të Kuvendit, objekti i hetimit të jetë konkret dhe të ekzistojnë të dhëna ose indicie të mjaftueshme. Por për anëtarët e Kushtetueses, i hartuar në këtë formë, ky nen nuk lë hapësira për formulim alternativ, që më pas çon edhe në rrëzimin e kërkesës për ngritjen e komisionit hetimor. “Duke lënë jashtë këtyre kritereve “formulimin alternativ” të objektit të hetimit, si një nga elementet që mundëson ngritjen e komisionit hetimor, formulimi aktual i dispozitës ligjore passjell cenimin deri në pamundësinë e ushtrimit të së drejtës së pakicës parlamentare.