Komisioni i Venecias ka njoftuar se Kryetari i Kuvendit të Shqipërisë, Niko Peleshi, i është drejtuar zyrtarisht me një kërkesë për opinion mbi projektligjin “Për financimin e partive politike”. Letra është dërguar në datë 27 prill, ndërsa projekt-opinioni pritet të diskutohet dhe miratohet në sesionin e 147 Plenar të Komisionit të Venecias që do të mbahet më datë 12 dhe 13 qershor 2026. Nisma ligjore për të cilën Peleshi kërkon opinion synon rregullimin e kuadrit ligjor për financimin e subjekteve politike në Shqipëri. Një nga dispozitat kryesore të projektligjit është neni 7, i cili parashikon ndalime të plota për kategori të caktuara individësh apo subjektesh që nuk mund të japin ndihma financiare ose materiale për partitë politike. Po ashtu parashikohen kufizime edhe për donacionet dhe mënyrën e kryerjes së tyre. Sipas projektligjit: çdo dhurim mbi 500 mijë lekë duhet të realizohet vetëm përmes sistemit bankar; shtetasit shqiptarë mund të dhurojnë deri në 200 mijë lekë në vit; personat fizikë të regjistruar sipas legjislacionit tatimor deri në 500 mijë lekë; personat juridikë deri në 1 milion lekë në vit kalendarik. Ndërkohë disa nga partitë e vogla kanë ngritur shqetësim, pasi sipas tyre kjo nismë ligjore nuk do ta frenojë financimin e partive nga individë ose subjekte jo të ligjshme.