Pas takimit me homologun grek, Kyriakos Mitsotakis, kryeministri Edi Rama veçoi dy çështje të nxehta, të mbetura pezull mes Shqipërisë dhe Greqisë, për të cilat do të intesifikohet puna diplomatike: ligji i luftës, që vazhdon të jetë në fuqi nga pala greke dhe çështja e detit, për të cilën ka një dakordësi për ta dërguar në Gjykatën Ndërkombëtare të Hagës. “Tashmë kemi një marrëveshje me qeverinë greke për të shkuar në Gjykatën Ndërkombëtare të Hagës. Kështu do të bëhet dhe i takon gjykatës të vendosë. Çështja ‘Beleri’ krijoi disa vështirësi në marrëdhënien tonë, nuk ka dyshim, dhe kjo ishte një tjetër pasojë e paqëllimtë e asaj që ndodhi. Duhet që njëherë e mirë të zgjidhim të gjitha çështjet që ka midis nesh dhe këtë po bëjmë. Ambicia jonë është që të përfundojë brenda këtij viti dhe që vjeshtën e ardhshme ne të deklarojmë që kemi dakordësi për të gjitha çështjet. Jemi shumë besimplotë. Kemi çështjen e pazgjidhur të ligjit të luftës, që duam të mos jetë më.”