Parlamenti arab, organi legjislativ i Ligës Arabe, e dënoi “njohjen e Jerusalemit si kryeqytet të Izraelit nga ana e Kosovës e po kështu, kritikoi ashpër vendimin e Prishtinës për ta vendosur ambasadën e saj në Jerusalem. “ Kjo është një lëvizje që shkel ligjin ndërkombëtar”, thuhet në deklaratë ku I kërkoi Kosovës që t’i përmbahet rezolutave ndërkombëtare mbi Jerusalemin. Kryetari i Parlamentit arab, Adel Assomi u shpreh se vendimi i Kosovës për ta njohur Jerusalemin, nuk ka ndikim ligjor dhe nuk do ta ndryshojë status quo-n historike të qytetit. Ai shtoi se fati i Jerusalemit mund të përcaktohet vetëm përmes negociatave dhe jo përmes vendimeve të njëashme, që sic tha, shkelin ligjin ndërkombëtar. Liga Arabe është themeluar në 1945 dhe përbëhet nga 22 shtete anëtare, ku përfshihen Egjipti, Jordani, Kuvajti, Palestina, Emiratet e Bashkuara Arabe, Bahrejni, e të tjera. Kosova dhe Izraeli e formalizuan në 1 shkurt vendosjen e marrëdhënieve diplomatike, vendim ky, që nga dy shtetet u cilësua si historik. Prishtina thotë se hapja e ambasadës në Jeruzalem do të ndodhë shumë shpejt dhe ambasadore pritet të jetë Ines Demiri. Ndërkaq, Serbia, që nënshkroi marrëveshjen e 4 shtatorit, po ashtu është zotuar se do ta zhvendosë ambasadën e saj nga Tel Avivi në Jerusalem, por Beogradi zyrtar nuk ka ndërmarrë asnjë veprim konkret deri më tani.