Evropa nuk do t'i nënshtrohet një bote më 'brutale', dhe në vend të kësaj mund të jetë baza nga e cila mund të rindërtohet një rend i ri ndërkombëtar, tha kryeministri kanadez Mark Carney. Ky i fundit foli si udhëheqësi i parë jo-evropian që mori pjesë në një takim të Komunitetit Politik Evropian, i cili u mblodh të hënën mes tensioneve të larta në ngushticën e Hormuzit dhe dyshimeve të përtërira në lidhje me angazhimin e SHBA-së ndaj NATO-s. "Ne nuk mendojmë se jemi të destinuar t'i nënshtrohemi një bote më transaksionale, izoluese dhe brutale, dhe tubime të tilla si këto tregojnë një rrugë më të mirë përpara," tha ai. Duke sugjeruar qartë se epokës së lidershipit amerikan po i vinte fundi dhe duke shpjeguar simbolikën e pjesëmarrjes së Kanadasë në një takim politik evropian, ai tha: “Është pikëpamja ime e fortë personale se rendi ndërkombëtar do të rindërtohet, por do të rindërtohet nga Evropa. Ne po demonstrojmë jo vetëm forcën e vlerave tona në mbrojtjen e një rendi ndërkombëtar të bazuar në rregulla, por edhe vlerën e forcës sonë”, shtoi ai. “Bota po kalon një përçarje në disa dimensione, integrimi po përdoret si armë nga disa dhe rregullat nuk po i kufizojnë hegjemonët”. Takimi i komunitetit politik evropian, i teti që nga krijimi i organizatës, po zhvillohet në Jerevan të Armenisë, një vend i zgjedhur si një mënyrë për të treguar vendosmërinë e Evropës për të parandaluar që vendi i vogël i Kaukazit të tërhiqet përsëri në orbitën e Rusisë.