Ajatollah Ali Khamenei, udhëheqësi suprem i Iranit ka ndërmarrë hapa të jashtëzakonshëm për të siguruar mbijetesën e Republikës Islamike në rast se ai vritet. Sipas burimeve të brendshme të cituara nga The Neë York Times, Khamenei, i cili besohet se ndodhet në një bunker për shkak të frikës nga atentatet, ka emëruar tre figura të larta të klerit si pasardhës të mundshëm të tij dhe ka caktuar zëvendësues për zinxhirin ushtarak të komandës. Në këtë situatë të tensionuar, Khamenei nuk po vepron vetëm për mbrojtjen personale, por për të garantuar vazhdimësinë e një regjimi që e ka drejtuar për më shumë se tre dekada. Ndërkaq, djali i tij, Mojtaba Khamenei, nuk është përfshirë në listën e pasardhësve të mundshëm, ndonëse më parë është konsideruar si një kandidat i fortë. Ky vendim duket se është marrë për të shmangur akuzat për nepotizëm dhe për të ruajtur stabilitetin institucional iranian. Zgjedhja e udhëheqësit të ri zakonisht i takon Asamblesë së Ekspertëve, e cila përbëhet nga 88 klerikë të zgjedhur nga populli. Megjithatë, zhvillimet e fundit tregojnë se Khamenei është duke ndërtuar një plan emergjent për transferimin e pushtetit jashtë këtij procesi formal, me qëllimin kryesor: shpëtimin e Republikës Islamike.