Udhëheqësi suprem i Iranit, që mbështet militantët e Hamasit dhe Hezbollahut që luftojnë Izraelin në Gaza dhe Liban, tha të hënën se duhet të jepen dënime me vdekje për udhëheqësit izraelitë, jo urdhër-arreste. Ajatollahu Ali Khamenei komentontoi një vendim të Gjykatës Penale Ndërkombëtare për të lëshuar urdhër-arreste të enjten për kryeministrin izraelit Benjamin Netanyahu, ish-shefin e tij të mbrojtjes dhe një udhëheqës të Hamasit, Ibrahim Al-Masri. “Ata lëshuan një urdhër arresti, por kjo nuk mjafton... Dënimi me vdekje duhet të jepet për këta liderë kriminelë”, tha Khamenei, duke iu referuar liderëve izraelitë. Në vendimin e tyre, gjykatësit thanë se kishte arsye për të besuar se Netanyahu dhe Yoav Gallant ishin penalisht përgjegjës për akte që përfshijnë vrasjen, persekutimin dhe urinë si një armë lufte, në kuadër të një "sulmi të gjerë dhe sistematik kundër popullatës civile të Gazës". Vendimi u prit me zemërim në Izrael, i cili e quajti atë të turpshëm dhe absurd. Banorët e Gazës shprehën shpresën se kjo do të ndihmonte në përfundimin e dhunës dhe se përgjegjësit për krimet e luftës do të dalin para drejtësisë. Izraeli ka hedhur poshtë juridiksionin e gjykatës me bazë në Hagë dhe mohon krimet e luftës në Gaza.