Vladimir Putin dyshohet se po planifikon një sulm masiv ajror ndaj Kievit, ku liderët botërorë janë mbledhur të shtunën, dhe sulmi mund të ndodhë "në çdo kohë", sipas inteligjencës amerikane. Keir Starmer, Emmanuel Macron i Francës, kancelari i ri gjerman Friedrich Merz dhe kryeministri polak Donald Tusk, janë të gjithë në kryeqytetin ukrainas. Armëpushimi tre-ditor i shpallur nga Putini përfundon të shtunën, ndërsa udhëheqësit do të jenë ende në Kiev. Ukraina ka akuzuar Rusinë se tashmë e ka shkelur armëpushimin disa herë. Zyrtarët amerikanë lëshuan një paralajmërim publik: "Ambasada e SHBA-së në Kiev ka marrë informacion në lidhje me një sulm ajror potencialisht të rëndësishëm që mund të ndodhë në çdo kohë gjatë disa ditëve të ardhshme. Ambasada, si gjithmonë, rekomandon që qytetarët amerikanë të jenë të përgatitur të strehohen menjëherë në rast se dëgjojnë alarmin për sulme ajrore. Një paralajmërim i ngjashëm u lëshua më 20 nëntor të vitit të kaluar, një ditë para se Rusia të godiste Dnipron me një raketë balistike Oreshnik. Inteligjenca ka zbuluar se Rusia planifikon të mbyllë hapësirën ajrore mbi vendin e saj të testimit të raketave Kapustin Yar midis orës 6:00 të mëngjesit të së hënës dhe 6:00 të mëngjesit të së martës. Ky është i njëjti vend nga ku Moska lëshoi raketën Oreshnik në Dnipro vitin e kaluar, e kjo mund të sinjalizojë se Rusia po planifikon një sulm të ngjashëm. Edhe media ruse ka raportuar ditët e fundit se putin ka dhënë miratimin për një sulm të ri me raketën Oreshnik. Çdo sulm i ri rus do të shënojë dështimin e përpjekjeve të mëdha për të detyruar Putinin të pranojë një armëpushim më të gjatë, 30-ditor. Zelensky ka kohë që ka këmbëngulur për një armëpushim të zgjatur për të krijuar një dritare për një marrëveshje të plotë paqeje. Por Putin ka treguar pak shenja të ndonjë dëshire për të ndaluar luftën.