Liderët e të gjitha shteteve evropiane, përveç Bjellorusisë dhe Rusisë (po ashtu edhe shteteve të vogla evropiane) do të takohen në Kështjellën e Pragës më 6 tetor për të diskutuar për çështjet që lidhen me situatën e sigurisë në kontinent, teksa lufta në Ukrainë po vazhdon. Ky takim po ashtu ka si objektiv edhe lancimin e Bashkësisë Politike Evropiane – një ide që fillimisht është promovuar në maj nga presidenti i Francës, Emmanuel Macron. Një ditë më pas, më 7 tetor, kryeqyteti çek do të jetë organizator i një samiti joformal të BE-së që po ashtu do të mbahet në Kështjellën e Pragës. Liderët nga 27 shtetet anëtare do të bisedojnë për sanksionet e Rusisë, për krizën energjetike, teksa kontinenti pritet të përballet me një dimër të vështirë. Ftesat u janë dërguar liderëve të 44 shteteve evropiane, dhe sipas diplomatëve të BE-së, ka pasur “përgjigje pozitive nga të gjithë, por disa nuk kanë kthyer ende përgjigje përfundimtare”. Është mësuar se presidenti i Serbisë, Aleksandar Vuçic, ende po heziton, sikurse homologu i tij turk, Recep Tayyip Erdogan. Kryeministrja e re e britanisë së madhe, Liz Truss, vendosi në moment të fundit ti thotë ‘Po’ ftesës duke i dhënë një shtysë pozitive idesë së Macron që shumëkush e ka hedhur poshtë që në krye të herës.