Qeveria miratoi të mërkurën një vendim, sipas të cilit të gjitha agjencitë funerale që duan të ofrojnë këtë shërbim duhet të aplikojnë te bashkitë ku ushtrojnë aktivitetin për licencë. Vendimi vendos disa kushte për agjencitë funerale, ku ndër të tjera sjell për herë të parë termin “Shtëpi funerale”, që në përcaktim është ambienti i padukshëm nga jashtë, i cili shërben si shtëpi pritjeje për kryerjen e ritualeve të lamtumirës dhe riteve të tjera në nderim të personave të vdekur. Aktualisht, agjencitë funerale në Shqipëri, përveç shërbimit funeral shtetëror, operojnë si biznese të regjistruara në Qendrën Kombëtare të Bizneseve. Numri i atyre të regjistruara shkon në disa qindra. Aktiviteti i tyre është shtuar për shkak të plakjes së popullsisë. Në vitin e pandemisë, Shqipëria regjistroi mbi 30 mijë të vdekur, ndërsa përgjatë vitit të kaluar, INSTAT raportoi për gati 24 mijë të vdekur. Kostoja e shërbimeve funerale varion sipas agjencive, por edhe sipas rretheve.