Forcat e armatosura izraelite nisën kwtw tw hwnw një breshëri bombardimesh kundër pozicioneve të Hezbollahut në Libanin jugor, ndërsa deklaruan se kanë eliminuar 15 anëtarë kryesorë të organizatës që nga fillimi i nëntorit. Forcat ajrore izraelite kryen një seri sulmesh në Libanin jugor dhe lindor, duke deklaruar se objektivi i tyre ishin pozicionet e Hezbollahut pro-iranian, pas bastisjes që kryen këtë mëngjes, në të cilën një person humbi jetën në rrugën që lidh qytetet më të mëdha në jug. Në një deklaratë, ushtria tha se kishte “eliminuar” një burrë që “kontrabandonte armë” në emër të Hezbollahut nëpër zona të ndryshme të Libanit. Izraeli ka përshkallëzuar sulmet e tij kundër Libanit ditët e fundit, duke akuzuar organizatën pro-iraniane për riarmatosje, pothuajse një vit pas luftës midis tyre. Disa sulme shënjestruan disa zona malore të rajonit Nabatiya në jug gjatë ditës, dhe dy të tjera shënjestruan vargmalin në pjesën lindore të vendit, i cili kufizohet me Sirinë, sipas agjencisë kombëtare të lajmeve libaneze (ANI). Ushtria izraelite tha në një deklaratë se goditi "disa infrastruktura terroriste" të Hezbollahut në rajonin Nabatiya dhe një "vend prodhimi dhe magazinimi për armë strategjike" në Luginën Bekaa, gjithashtu në Libanin lindor.