Dita e parë e pas zgjedhjeve pati një surprizë, pikërisht atëherë kur nuk pritej. Tom Doshi, dha dorëheqjen, ndërsa një orë më pas përmes një letre publike sqaroi votuesit e tij përse e dha këtë vendim. “Kam hequr dorë nga mandati, por jo nga Partia Socialdemokrate dhe as nga angazhimi politik për përmbushjen konstante të premtimeve ndaj jush. Për këto premtime, siç e kam vërtetuar edhe në të kaluarën, do të punoj çdo ditë, fushatë elektorale ose jo, duke qënë pikërisht ky angazhim busulla ime e përditshme në angazhimin politik” I pari në listën e kandidatëve të Partisë Socialdemokrate, Tom Doshi shpjegon arsyet e dorëheqjes. “Dua që të jem plotsisht i lirë që t’i përkushtohem me të gjitha mjetet që më ofron ligji, mbrojtjes së emrit tim prej lakimit të pavend dhe tendencioz që i është bërë kohët e fundit, duke çliruar kështu energjitë e PSD vetëm drejt misionit politik dhe përfaqësimit të interesave të qytetarëve. Në parlament apo jashtë parlamentit Tom Doshi është dhe do të jetë gjithmonë me ju, sepse do të vijoj të jem në udhëheqje të PSD-së dhe nuk do t’ju braktis asnjëherë” Tom Doshi shpjegon se nuk do të jetë në parlament, por PSD do të jetë aty me kandidatët e saj.