Kolosi i letrave shqipe Ismail Kadare ka ndërruar jetë mëngjesin e kësaj të hëne në moshën 88-vjeçare. Veprat e shkrimtarit janë përkthyer në rreth 45 gjuhë të ndryshme, duke qenë kështu përfaqësues kryesor i letërsisë shqipe nëpër botë. Letërsia e Kadaresë ka dhënë një kontribut të çmuar në letërsisë kombëtare. Kadare ka qenë disa herë kandidat për çmimin “Nobel” në Letërsi, dhe është nderuar me shumë çmime ndërkombëtare, mes të cilëve Çmimin “Man Booker International” më 2005, çmimin “Princesa de Asturias” për Artet më 2009 dhe Çmimin “Jeruzalem” më 2015, më 2023-shin më dekoratën “Oficer i Madh të Legjionit të Nderit” nga presidenti i Francës, Emmanuel Macron. Kadare lindi në Gjirokastër më 28 janar 1936. Ai ka qenë akademik, politikan, ish-deputet i Kuvendit Popullor gjatë viteve 1970-’82, zv/kryetar i Frontit Demokratik dhe një ndër shkrimtarët më të mëdhenj bashkëkohorë. Ai shquhet shquhet kryesisht për prozë, por kontributi i tij shtrihet edhe në dramaturgji, poezi dhe përkthime. Në vitin 1996 Kadare u bë anëtar i përhershëm i Akademisë së Shkencave Morale dhe Politike në Francë.