Ministria e Mbrojtjes së Japonisë njoftoi të dielën se Koreja e Veriut lëshoi në det, në lindje të Gadishullit Korean, atë që dukej të ishte një raketë balistike. Ministria e Mbrojtjes së Koresë së Jugut deklaroi se rivali i saj verior kishte lëshuar një predhë të paidentifikuar. Transmetuesi publik japonez NHK raportoi se raketa ra jashtë zonës ekskluzive ekonomike të Japonisë. Një ditë më parë, Koreja e Veriut hodhi poshtë një rezolutë të agjencisë së OKB-së për mbikëqyrjen bërthamore, e cila kundërshtonte programin bërthamor të Phenianit; qëndrimi u bë i ditur përmes një deklarate të lexuar në mediat shtetërore. Javën e kaluar, Pheniani dënoi gjithashtu një stërvitje detare të udhëhequr nga SHBA, në të cilën morën pjesë Koreja e Jugut dhe Japonia, dhe që u zhvillua nga 29 gushti deri më 10 shtator pranë Guamit. Të premten, Kim Yo Jong, motra me ndikim e liderit Kim Jong Un, fajësoi stërvitjet ushtarake të udhëhequra nga SHBA-ja për tensionet që "po përshkallëzohen vazhdimisht" në Gadishullin Korean dhe u zotua se nuk do të ketë ndryshim në kursin e vendit për forcimin e arsenalit të tij bërthamor.