Rusia dhe Bjellorusia po bëjnë prova për lëshimin e armëve bërthamore taktike ruse si pjesë e lojërave të përbashkëta të luftës, tha të martën udhëheqësi bjellorus Aleksandër Lukashenko. Mediat shtetërore cituan shefin e shtabit të ushtrisë bjelloruse të thoshte se stërvitjet përfshinin edhe raketën hipersonike Oreshnik të Rusisë, të cilën Moska e testoi vitin e kaluar në luftën me Ukrainën. Rusia dhe Bjellorusia po përfundojnë pesë ditë lojërash lufte, me emrin e koduar Zapad ose Perëndimi, në një shfaqje force që ata thonë se është projektuar për të testuar gatishmërinë e tyre luftarake, por që ka shqetësuar disa vende përreth duke pasur parasysh luftën në vazhdim. Lojërat e luftës, të cilat analistët ushtarakë perëndimorë thonë se janë projektuar për të frikësuar Evropën, vijnë vetëm disa ditë pasi forcat polake dhe ato të NATO-s rrëzuan dronë rusë që hynë në hapësirën ajrore të Polonisë. Varshava ka mbyllur përkohësisht kufirin e saj me Bjellorusinë si masë paraprake. Bjellorusia, një aleate e ngushtë e Rusisë që kufizohet me Ukrainën dhe Rusinë, si dhe anëtarët e NATO-s Poloninë, Lituaninë dhe Letoninë, mban armë bërthamore taktike ruse, të cilat Moska i ka nën kontroll. Minsku ka punuar për të rihapur dhe rinovuar objektet e tij të magazinimit bërthamor të epokës sovjetike. Agjencia shtetërore bjelloruse e lajmeve Belta citon Lukashenkon të ketë thënë se ishte e natyrshme që armët bërthamore taktike ruse të vendosura në vend, të bëheshin pjesë e stërvitjeve Zapad. "Ne po praktikojmë gjithçka. Perëndimi e di këtë, ne nuk po e fshehim. Nga përdorimi i armëve të vogla konvencionale e deri te kokat bërthamore. Ne duhet të jemi në gjendje t'i bëjmë të gjitha këto. Përndryshe, pse do të ishin këto armë në territorin bjellorus?" citohet të ketë thënë ai. "Por ne absolutisht nuk planifikojmë të kërcënojmë askënd me këtë", shtoi ai. Ministria bjelloruse e Mbrojtjes konfirmoi në një deklaratë se përdorimi i armëve bërthamore taktike ishte provuar së bashku me vendosjen e raketës balistike Oreshnik me rreze të mesme veprimi të Rusisë. Presidenti rus Vladimir Putin tha në fund të vitit të kaluar se Rusia mund të vendosë Oreshnikët, që ai pretendon se janë të pamundur të interceptohen, në territorin e Bjellorusisë, në gjysmën e dytë të vitit 2025.