Shërbimet e emergjencës janë në gatishmëri të lartë në Kretë të enjten, pasi një tërmet me magnitudë 6.1 goditi ishullin grek, duke shkaktuar dridhje që i ndjenë në të gjithë Turqinë dhe Izraelin. Brigada e zjarrfikësve tha se nuk ka marrë asnjë telefonatë për ndihmë deri më tani dhe nuk ka patur as raportime për dëme serioze materiale. Lëkundja e tokës, e cila goditi 79 km larg qytetit të Heraklionit në orën 6:19 të mëngjesit të së enjtes, tronditi vendasit dhe turistët që po pushonin në ishull në fillim të sezonit të verës. Videoja e kamerave të sigurisë e postuar në Facebook tregoi vazot në ballkone që dridheshin për disa sekonda. Banorët u përgatitën për një cunami të mundshëm pasi Qendra Sizmologjike Evropiane-Mesdhetare (EMSC) lëshoi një paralajmërim dhe i këshilloi njerëzit në Greqi, Turqi, Itali e madje deri në Francë dhe Portugali të drejtoheshin te autoritetet e tyre lokale për përditësime.