Trump, i cili mori detyrën më 20 janar, diskutoi për luftën të mërkurën me presidentin rus Vladimir Putin dhe më pas edhe me presidentin ukrainas Volodymyr Zelenskiy dhe u tha zyrtarëve amerikanë që të fillonin bisedimet për t'i dhënë fund luftës gati tre-vjeçare. Bisedat telefonike erdhën menjëherë pasi Sekretari i Mbrojtjes Pete Hegseth u tha aleatëve ushtarakë të Ukrainës në Bruksel se një kthim në kufijtë e Ukrainës para 2014, përpara se Rusia të aneksonte Krimenë, ishte jorealist dhe se SHBA nuk e sheh anëtarësimin në NATO të Kievit si pjesë e një zgjidhjeje. Ai tha se trupat amerikane nuk do të jenë pjesë e ndonjë pranie të sigurisë në Ukrainë. Michael McFaul, ish-ambasador i SHBA-së në Rusi nën administratën e Presidentit Barack Obama nga viti 2012 deri në 2014 vuri në pikëpyetje strategjinë e administratës Trump ndaj Rusisë dhe Ukrainës përpara negociatave të afërta. “Pse administrata Trump po i bën dhurata Putinit – tokë ukrainase dhe jo anëtarësim në NATO për Ukrainën – para se të fillojnë negociatat?” pyeti McFaul në platformën X. "Unë kam negociuar me rusët. Ju kurrë nuk u dorëzoni asgjë atyre falas".