Një tërmet i fuqishëm me magnitudë 5.5 goditi Spanjën jugore këtë mëngjes. Tërmeti tronditi më shumë se 50 qytete, veçanërisht provincën e Malagës, e cila mban edhe destinacionin e njohur turistik, Costa del Sol. Lëkundja më e madhe e tokës u regjistrua nga Instituti Kombëtar Gjeografik i Spanjës në orën 7.13 minuta të mëngjesit të së hënës. Ai goditi në një thellësi prej mbi 3 km nën nivelin e detit, pranë brigjeve të Almerías në Spanjën juglindore. Lëkundjet u ndjenë kryesisht në Granada, Malaga, Jaen dhe tre provinca lindore, Murcia, Alicante dhe Albacete. "Isha duke fjetur dhe e gjithë shtëpia u drodh për disa sekonda", tha një turiste në Almeria. Shërbimet e emergjencës në Andaluzi morën 25 telefonata për ndihmë nga banorët. Sipas klasifikimit zyrtar në spanjë, tërmeti arriti një intensitet të lartë duke u klasifikuar si tërmet i fortë. Thellësia e vogël e tërmetit do të thotë se ai u ndje më shumë në zonat pranë epiqendrës. Një alarm u dërgua në telefonat celularë të banorëve në Almeria dhe Granada, duke i paralajmëruar ata për tërmetin më herët. Alarmi përfshinte rekomandime se çfarë të bënin pas një tërmeti. Alarmi gjithashtu paralajmëroi se pasgoditjet ishin të mundshme. Deri më tani nuk janë raportuar të lënduar ose dëme. Zona e Mesdheut përgjatë brigjeve të Spanjës, Marokut, Algjerisë dhe Italisë përballet shpesh me tërmete të vogla. Tërmeti më i madh i regjistruar ndonjëherë ka qenë ai i 22 majit 1960 në Kili, me magnitudë 9.5 që zgjati për 10 minuta dhe shkaktoi edhe një cunami. Ndërs tërmeti i dytë më i madh i regjistruar është ai i ndodhur në ishullin e Sumatrës në Indonezi, në vitin 2004. Tërmeti me magnitudë 9.3 shkaktoi një cunami katastrofik në oqeanin indian dhe besohet se ka vrarë mbi 280 mijë njerëz.