Drejtoria e Përgjithshme e Shërbimeve të Transportit Rrugor ka njoftuar se brenda 6-mujorit të parë të vitit 2021, do të aplikohet formati i ri i Lejes së Qarkullimit për mjetet rrugore për të gjitha veprimet e reja me mjetin, ku qytetarët do përfitojnë në cilësi, siguri dhe besueshmëri të produktit si edhe kosto të reduktuara ndjeshëm të shërbimeve, të shpjeguara në mënyrë më të detajuar më poshtë: Aktualisht, qytetarët paguajnë 3,500 lekë së bashku për Lejen e Qarkullimit, Certifikatën e Pronësisë dhe Lejen Ndërkombëtare të Mjetit. Drejtoria e përgjithshme e shërbimit te transportit rrugor po përgatit procedurën teknike për lëshimin dhe personalizimin e dokumentit të ri unik që do të kushtojë 2100 lekë. Leja e re nuk do ketë vula kolaudimi, për rrjedhojë nuk do bëhet e pavlefshme nga mungesa e vendit për vula si leja aktuale. Leja e re nuk ka afat vlefshmërie! Leja e re do jetë më e vogël, me tri pjesë, më praktike e rezistente, si edhe me çdo të dhënë të mjetit, të kodifikuar! Ajo nuk është e detyrueshme për qytetarët që kanë lejen aktuale të mjetit. Leja e re jo vetëm rrit standardet, por edhe u kursen kohë e para qytetarëve. Ky operacion bazuar në numrin e pritshëm të shërbimeve do t’u kursejë qytetarëve rreth 1,35 milionë Euro për vitin 2021.