Komuna e Prishtinës ka reaguar pas kallëzimit penal në Prokurorinë Speciale nga Vetëvendosje dhe pas dyshimeve të ngritura lidhur me pretendimin për përfshirje të kryetarit Përparim Rama dhe zyrtarëve të lartë të Komunës në legalizime të paligjshme të objekteve. Përmes një reagimi në rrjetin social Facebook, Komuna e Prishtinës sqaron se pret trajtimin e rastit nga Prokuroria dhe organet kompetente të drejtësisë dhe se pas vendimit të tyre do të ndërmarrë verprimet ligjore ndaj kujtdo që e ka shkelur ligjin. Komuna ka konfirmuar se bëhet fjalë për shefin e kabinetit të Ramës, Florent Maliqi, dhe se për rastin kryeqyteti do të ofrojë bashkëpunim të plotë me organet e drejtësisë. “Pas vendimit të Prokurorisë, do t’i ndërmarrim pa asnjë hezitim të gjitha veprimet dhe procedurat ligjore ndaj kujtdo që rezulton se ka shkelur ligjin”, thuhet në postim.