Presidenti rus Vladimir Putin mbërriti në kryeqytetin e Azerbajxhanit, Baku, të dielën për një vizitë shtetërore dyditore, njoftuan agjencitë ruse të lajmeve. Televizioni rus transmetoi pamje të avionit të presidentit rus teksa u ndal në pistën e aeroportit në mbrëmje. Vizita e tij në vendin e Kaukazit, një partner i ngushtë i Moskës dhe Turqisë, por edhe një furnizues kryesor i energjisë për vendet perëndimore, vjen në sfondin e një ofensive të paprecedentë ushtarake ukrainase në tokën ruse. Putini do të zhvillojë bisedime me homologun e tij në Azerbajxhan, Ilham Aliyev, për marrëdhëniet dypalëshe dhe "problemet ndërkombëtare dhe rajonale", tha Kremlini. Të dy udhëheqësit darkuan të dielën në mbrëmje në rezidencën zyrtare të presidentit të Azerbajxhanit, tha agjencia lokale zyrtare e lajmeve Asertac. Gjatë ditës, Aliyev dhe Putin do të firmosin dokumente të përbashkëta dhe do të bëjnë deklarata për shtypin, tha agjencia ruse Ria Novosti. Putin do të vendosë gjithashtu një kurorë me lule në varrin e Hajdar Alijev, babait të liderit aktual, i cili ishte president nga viti 1993 deri në vitin 2003.