Rozeta Dobi, e dënuar për vjedhjen e mbi 500 mijë eurove në banesën e ish-zyrtares së lartë Alda Klosi, është liruar këtë të mërkurë nga burgu i grave në Pojskë, pasi përfitoi nga amnistia penale. Emri i saj u bë i njohur në fillim të vitit 2023, kur u arrestua nën akuzën e vjedhjes së 120 mijë eurove, 30 mijë dollarëve amerikanë dhe sendeve me vlerë nga banesa ku punonte si pastruese prej disa vitesh. Por hetimet zbuluan një shumë edhe më të madhe parash. Gjatë kontrollit në banesën e Dobit, policia sekuestroi 404 mijë euro, 8500 dollarë amerikanë dhe bizhuteri floriri të fshehura në tubin e aspirimit. Gjithashtu, u sekuestruan mbi 58 mijë euro, 7 mijë dollarë, 368 mijë lekë dhe tre automjete, dy prej të cilave dyshohej se ishin blerë me paratë e përfituara nga vjedhja. Sipas hetimeve në atë kohë, Dobi dyshohej se kishte vepruar në bashkëpunim me djalin e saj, Havier Dobin. Pas denoncimit për grabitjen e kasafortës nga apartamenti, policia nisi hetimet dhe zbuloi se ndaj Dobit kishte edhe denoncime të tjera për vjedhje të përsëritura. Bashkë me Rozeta Dobin nga burgu i grave në Pojskë kanë fituar lirinë edhe gra të tjera të dënuara, ndërsa disa të tjera kanë përfituar ulje të masës së dënimit. Dosja mori jehonë për shkak të shumave të mëdha të parave të sekuestruara, ndërsa hetimet u shtrinë edhe mbi burimin e tyre.