Nënkryetari i Lidhjes Demokratike të Kosovës, Lutfi Haziri ka reaguar ndaj kritikave dhe këshillave që, sipas tij, i drejtohen kësaj partie, duke thënë se LDK i takon anëtarësisë dhe jo funksionarëve. Të premten, Haziri tha se LDK u takon idealistëve dhe se idealistët janë anëtarësia, duke theksuar se është koha që "LDK-ja t’u kthehet idealistëve, anëtarësisë". Ai ka thënë se LDK-në "nuk ka as zgjidhje e as zgjedhje" dhe se rikthimi i saj ndodh përmes një marrëveshjeje të madhe politike. "Periudha post-independente dhe post-Rugoviste, veç një gjë e ka konfirmuar: që pa LDK-në nuk ka as zgjidhje e as zgjedhje. Stabiliteti e normalizimi i Republikës kalon përmes zyrave të LDK-së! Ia kemi borxh anëtarësisë dhe të ardhmes së Republikës. Koha më ka dhënë të drejtë që rikthimi i madh i LDK-së ndodh nga lart-poshtë, me marrëveshje të madhe politike, pa e dëmtuar demokracinë e brendshme", shkroi Haziri. “I duroj e mundohem t’i kuptoj ata që merren me LDK-në duke na këshilluar e mësuar se si duhet të sillemi, çka duhet e çka nuk duhet të bëjmë”, shtoi Haziri.