Aleksey Navalny i ka dhënë fund grevës së urisë në ditën e 24. Opozitari i burgosur rus ka njoftuar përmes një postimi në instagram se do ti jepte fund qëndrimit pa ngrënë, pas paralajmërimit nga mjekët e tij se, vazhdimi i saj i kërcëntonte seriozisht jetën. Navalni shkruante se ai do të vazhdojë të kërkojë të vizitohet nga mjeku i tij, për trajtimin e një humbjeje të ndjeshmërisë tek këmbët dhe krahët.. "Falë mbështetjes së madhe të njerëzve të mirë në të gjithë vendin dhe në të gjithë botën, ne kemi bërë përparim të madh", tha ai në mesazhin e tij. Politikani 44-vjeçar, i cili u arrestua në fillim të këtij viti dhe po vuan një dënim prej 2 vitesh e gjysmë, e filloi grevën e urisë më 31 mars si protestë ndaj refuzimit të autoriteteve të burgut që ai të vizitohej nga mjekët e tij, pasi ndjente dhimbje të forta në shpinë e mpirje të këmbëve. Zyrtarët rusë kanë këmbëngulur që zoti Navalni ka marrë të gjithë ndihmën e duhur mjekësore, por udhëheqësi i opozitës ka thënë se efektivisht, ai nuk kishte marrë asnjë trajtim. Të mërkurën në mbrëmje në të gjithë Rusinë u zhvilluan protesta të reja masive ku kërkohej lirimi i zotit Navalni. Një ndihmës kryesor i tij, tha se protestat e së mërkurës në mbrëmje duket se kishin nxitur autoritetet ruse që t’i siguronin zotit Navalni ndihmën mjekësore që ai kishte kërkuar që në fillim të grevës së urisë. Nga ana tjetër Shtetet e Bashkuara e kishin paralajmëruar Moskën se do të përballeshin me pasoja të rënda nëse ai vdiste në burg.