Më shumë se dy milionë njerëz kanë marrë pjesë në një koncert falas të Lady Gaga-s në plazhin Copacabana në Rio de Janeiros, thanë zyrtarët e qytetit. Koncerti më i madh i yllit të pop-it u pagua nga qyteti në një përpjekje për të rigjallëruar ekonominë e Rios. Ata presin që kjo të sjellë mbi 100 milionë dollarë për ekonominë lokale. Performanca e së shtunës ishte pjesë e një turneu promovues për albumin e tetë të Lady Gaga-s, Mayhem, këngët e të cilit përfshijnë Abracadabra dhe Die Ëith a Smile. Ajo performoi për herë të fundit në Brazil në vitin 2012. Një operacion masiv sigurie u zhvillua me 5,000 oficerë policie në detyrë dhe pjesëmarrës që duhej të kalonin nëpër detektorë metali. Autoritetet gjithashtu përdorën dronë dhe kamera për njohjen e fytyrës për të ndihmuar policinë në garantimin e sigurisë. Lady Gaga nuk është personi i parë që mban një koncert falas në Rio. Madonna dha një koncert në plazhin e Copacabanës në maj të vitit 2024, i cili u pagua gjithashtu nga qyteti. "Më pritët për më shumë se 10 vjet", u tha Lady Gaga e emocionuar turmave ndërsa shpalosi një flamur brazilian. "Brazil, jam gati. Do të jap gjithçka nga vetja." Ylli i popit u shfaq me kostume me temë braziliane për disa nga performancat e saj, me veshje të frymëzuara nga ekipi kombëtar i futbollit. Mijëra njerëz kënduan së bashku me të hitet e saj më të njohura, duke përfshirë Alejandro, Poker Face dhe Abracadabra, duke krijuar një atmosferë elektrike ndërsa shumë të tjerë e ndoqën koncertin nga ekranet e mëdha përgjatë plazhit. Fansat udhëtuan nga i gjithë vendi për të parë performancën madhështore.