Të infektuarit me covid 19 në Shqipëri janë rritur ndjeshëm në harkun kohor të muajit tetor dhe dy javëve të para të nëntorit, ndërsa opozita përmes kryetarit të saj Lulzim Basha, thuajse çdo ditë ka kërkuar që të shtohen testimet. Ndonëse, autoritetet shëndetësore, të paktën referuar shifrave zyrtare e kanë bërë një gjë të tillë, ka edhe një fakt, se vendi ynë po punon me kapacitetet në dispozicion, qoftë edhe në bërjen e testeve. Në rrjetin social facebook, kryeministri Rama ka publikuar një video nga brenda laboratorit të testimeve në Institutin e Shëndetit Publik, laborator për të cilin thotë se gjithçka është sipas standarteve të Bashkimit të Europian. Sipas Ramës, ky laborator testimi për koronavirusin nuk ka asnjë krahasim të imagjinueshëm me kushtet e disa viteve më parë. Në statusin e tij shoqëruar me videon përkatëse kryeministri Rama shkruan se në këtë institute të shëndetit publik punon me tre turne një ekip fantastik specialistësh të nivelit ndërkombëtar dhe që i karakterizon një përkushtim i admirueshëm. Postimin e tij në facebook Rama e mbyll me hashtagun respekt.