Duart e zhveshura dhe lopatat lëvizin nëpër rrënoja, ndërsa një dron skanon sipër rrënojave çdo sekondë. Çdo moment, çdo veprim ka rëndësi. Është një garë me kohën për të gjetur të mbijetuarit. Këtu në shtetin bregdetar të La Guaira, i cili kufizohet me distriktin e kryeqytetit që përfshin edhe Karakasin aty pranë, dëmet katastrofike, sipas BBC, shihen pothuajse kudo që hedh sytë. Ky shtet ka qenë një nga zonat më të goditura pas tërmeteve të njëpasnjëshme që goditën Venezuelën të mërkurën. Banorët dhe familjet po kërkojnë me dëshpërim në rrënoja për të dashurit dhe sendet e tyre personale. Ata po dëgjojnë me kujdes për çdo zhurmë që mund t’I orjentojë se dikush është gjallë i bllokuar nën mbeturinat e betonit dhe telave metalikë. Deri më tani, zyrtarët kanë konfirmuar të paktën 1,430 vdekje nga tërmetet me magnitudë 7.2 dhe 7.5 - ky i fundit është një nga tërmetet më të forta të regjistruara në vend nga shekulli I kaluar. Numri i të vdekurve dhe të plagosurve rritet çdo orë. OKB-ja vlerëson se rreth 50,000 njerëz janë të zhdukur. Ekipet kombëtare të shpëtimit janë të pakta, megjithëse shpëtimtarë ndërkombëtarë nga Meksika, Spanja, SHBA-ja dhe Mbretëria e Bashkuar kanë mbërritur për t'u bashkuar me përpjekjet e shpëtimit. Por, prapë nuk mjafton, shkruan BBC. Agjencitë e ndihmës humanitare thonë se 72 orët e para janë thelbësore për shpëtimin e njerëzve të gjallë, megjithëse kjo periudhë mund të jetë më e gjatë nëse ata që janë të bllokuar kanë qasje në ushqim dhe ujë.