Bashkë me emërimin e presidentit të ri të republikës, do të hyjë në fuqi edhe një ligj i posaçëm, që kushtëzon kompetencat dhe raportin e institucionit të presidentit me ekzekutivin. 24 korriku shënon përfundimin e një mandati presidencial për Shqipërinë, ku Kuvendi dhe Presidenca përfunduan në dyert e Gjyqësorit pas përplasjeve të vazhdueshme për dekretet e presidentit Meta, apo emërimet e ministrave dhe kundërshtimet për numrin e lartë të dekoratave. Duke marrë shkas nga precedenti që po lë pas Ilir Meta, socialistët, ende pa u larguar Meta nga zyra presidenciale, kanë filluar punën për hartimin e një ligji organik, që kufizon ndjeshëm kompetencat e kreut të shtetit. Përgjatë disa viteve, miratimi i një ligji për kompetencat e presidentit, ka kaluar dy herë në parlament, megjithatë nuk ka marrë asnjëherë miratimin e shumicës parlamentare. Që prej vitit 2016, kur aso kohe kryetar i kuvendit ishte Ilir Meta, u propozua nga Ulsi Manja një projektligj i ngjashëm me atë që synohet të hartohet sot, në lidhje me institucionin e presidentit, i cili nuk mori mbështetjen e parlamentit dhe aktualisht ka statusin ‘projektligj i tërhequr’.