Në mbledhjen e Kryesisë së Kuvendit të Kosovës është vendosur që seanca për votimin e qeverisë së re të mbahet nesër në ora 11:00. Këtë e bëri të ditur kreu i grupit parlamentar të LDK-së, Arben Gashi. Ai nuk komentoi nëse të gjithë deputetët e Lidhjes Demokratike të Kosovës do të votojnë pro kësaj qeverie, megjithatë, shtoi se i kanë votat që u nevojiten. “ Nesër secili ka mundësinë të japë vlerësimin e vet përmes diskutimit e pastaj përmes votës. Ne i kemi votat e duhura, të gjitha janë përmbyllur”, tha ai. I pyetur nëse kanë diskutuar për kryeparlamentaren Vjosa Osmani, nëse do ta drejtojë ajo seancën, Gashi u përgjigj se për këtë temë vendos ajo vetë. LDK-ja e dorëzoi një ditë më parë në Kuvend kërkesën për séancën e jashtëzakonshme, ku pritet të votohet qeveria me në krye Avdullah Hotin.