Kuvendi nuk humbet kohë! Pak orë pasi Parlamenti miratoi autorizimin e SPAK për arrestimin e deputetit Sali Berisha, i ka dërguar Prokurorisë së Posaçme vendimin që njofton zyrtarisht heqjen e imunitetit të ish-kryeministrit. Berisha, një politikan që ka dominuar për 34 vite skenën politike shqiptare nuk e mbron më imuniteti nga arrestimi. Këtë të enjte, në një seancë në më pak se 9 minuta, me 75 vota pro, 73 të PS dhe 2 të PSD, pa praninë e demokratëve të Bashës, Kuvendi miratoi kërkesën e SPAK për të kërkuar në GJKKO arrest në burg për Sali Berishën. Në votim ishte dhe Kryeministri Edi Rama. Tentativat e Berishës dhe deputetëve të opozitës që e mbështesin për ta pamundësuar zhvillimin e seancës nisën që herët, por nuk mundën ta ndalonin procesin. Kryetarja e Kuvendit, Lindita Nikolla, e ftoi zotin Berisha të merrte fjalën për të dhënë shpjegimet e veta, por ai nuk pranoi, ndërsa kërkonte që punonjësit e shërbimit të largoheshin nga salla, ndaj ajo nisi menjëherë votimin. Berisha e cilësoi edhe vendimin e sotëm një akt të paligjshëm dhe antikushtetues.