Partia Demokratike e Kosovës ka vendosur të mos marrë më pjesë në seancat e Kuvendit, duke e cilësuar të bllokuar procesin e konstituimit nga Lëvizja Vetëvendosje. PDK argumenton se afati kushtetues për konstituimin e Kuvendit ka përfunduar më 7 gusht, ndërsa edhe afati i dytë i vendosur nga Vetëvendosje, 6 shtatori, nuk është respektuar. Sipas PDK-së, pavarësisht tejkalimit të afateve, partia mori pjesë në seancat e 9 dhe 11 shtatorit, me synimin që procesi të përmbyllej përpara 16 shtatorit, kur pritet një vendim i rëndësishëm në Hagë. Por, sipas opozitës, edhe këto seanca dështuan për shkak të mosmarrëveshjeve për zgjedhjen e nënkryetarëve të Kuvendit. PDK pretendon se e mbajti marrëveshjen duke votuar kandidatin e Vetëvendosjes për nënkryetar, ndërsa LVV nuk votoi kandidaten e PDK-së. ‘Për PDK, Kushtetuta nuk është pazar politik’, thuhet në deklaratë, ndërsa PDK thekson se konstituimi i Kuvendit është detyrim kushtetues dhe nuk mund të kushtëzohet me marrëveshje politike. Në këto kushte, PDK njofton se ekspertët e saj po përgatisin rastin që do t’i dërgohet Gjykatës Kushtetuese, duke kërkuar qartësi për procesin në tërësi.