Ankimimi i ish-kreyministrit Sali Berisha për kundërshtimin e masës së sigurimit “detyrim paraqitje” do të merret në shqyrtim nga Gjykata Kushtetuese këtë të martë. Bëhet me dije se seanca do të zhvillohet pa praninë e palëve që janë pjesë e procesit, ndërsa do të jenë gjyqtarët që do të bëjnë analizë të të dhënave shkresore. Dosja e Berishës përfundoi në Gjykatën Kushtetuese, pasi ish-kryeministri kundërshtoi masën e dhënë nga SPAK, për tu paraqitur në gjykatë sa herë që të thirret. Berisha ka kundështuar masën e sigurisë, pasi sipas tij, për shkak se ishte deputet, do duhej që në fillim të ishte mbledhur Këshilli i Mandateve. Megjithatë SPAK është shprehur se kjo nuk ka qenë e nevojshme, pasi masa e dhënë ndaj tij nuk e pengon të vijojë aktivitetin e tij politik. Ish-kryeministri ndodhet në masën e sigurisë “arrest shtëpie” që prej datës 30 dhjetor të vitit të kaluar, masë kjo që iu ashpërsua pasi nuk respektoi masën e mëparshme detyrim paraqitje dhe ndalim i daljes jashtë vendit. Berisha dyshohet si pjesë e një hetimi për dyshimet për korrupsion gjatë privatizimit të kompleksit sportiv “Partizani” së bashku me dhëndrin e tij Jamarbër Malltezi. Ky i fundit dyshohet se ka përfituar shumën 5.4 milionë euro në mënyrë të parregullt, nga privatizimi i ish-kompleksit sportiv.