Komisionerja për Zgjerimin e Bashkimit Evropian, Marta Kos, ka njoftuar se BE-ja po përgatit një strategji për të mbrojtur vendet kandidate nga ndikimi i jashtëm, kërcënimet hibride, manipulimi i informacionit dhe dezinformimi, veçanërisht gjatë proceseve zgjedhore. Sipas saj, në fillim të vitit 2027 do të nisë funksionimin një Qendër për Rezistencë Demokratike, e cila do të mbulojë gjashtë vendet e Ballkanit Perëndimor. Qendra do të fokusohet në mbrojtjen e proceseve zgjedhore, përdorimin e Inteligjencës Artificiale, sigurinë dhe integritetin e zgjedhjeve, ndërsa platforma e saj do të diskutohet më 4 shtator në takimin e ministrave të Jashtëm të BE-së dhe vendeve kandidate. Kos tha se vendet kandidate po sulmohen sepse kanë zgjedhur rrugën drejt integrimit në BE dhe demokracisë, duke sjellë si shembull Malin e Zi. Ajo theksoi se menjëherë pasi u njoftua puna për traktatin e anëtarësimit të Malit të Zi, u shtuan ndjeshëm sulmet hibride dhe fushatat e dezinformimit kundër procesit të integrimit të vendit. Ajo shtoi se Bashkimi Evropian po zhvillon edhe një fushatë ndërgjegjësimi në shtetet anëtare, veçanërisht në Francë, ku mbështetja për zgjerimin mbetet e ulët, ndërsa një pjesë e rëndësishme e përpjekjeve do të përqendrohet te zgjedhjet që do të mbahen vitin e ardhshëm në disa prej vendeve kandidate.