Përballja me drejtësinë, nuk do i gjejë asnjëherë socialistët nën ombrellën e partisë. Me këtë refren kryeministri Edi Rama paralajmëroi drejtorët, kryebashkiakët, deputetët dhe ministrat socialistë, nga salla e grupit parlamentar në kryesinë e kuvendit, se kush zgjedh të bëjë një rrugë e dy punë do mbajë përgjegjësi i vetëm para drejtësisë. Rama: “Nëse s’ke bërë asgjë s’ke nevojë të të mbaj unë dhe PS-ja, të mban e vërteta, prandaj lufto për të vërtetën tënde, se kjo parti e kjo qeveri nuk bëjnë dot asnjë koment për çështjet që hap SPAK-u, jo më avokatinë e një drejtori, kryebashkiaku, deputeti apo ministri të kërkuar nga SPAK-u. Madje, sa më lart të jetë ngjitur kërkesa e SPAK-ut aq më shumë ne e presim të vërtetën vetëm nga SPAK-u, jo nga i lartësuari prej nesh që kërkon dhe që të mos e lëshojmë.”