Shtetet e Bashkuara të Amerikës e kanë përfshirë Shqipërinë në platformën globale kundër korrupsionit duke futur në listën e Zezë dhjetëra zyrtarë të akuzuar për korrupsion dhe lidhje me krimin e organizuar. Kësaj nisme i është bashkuar edhe Britania e Madhe, e cila ka shpallur së fundmi non grata 27 politikanë dhe biznesmenë të nivelit të lartë, mes të cilëve është edhe ish-kryeministri Sali Berisha. Por i pari që ka përfunduar në listën e zezë të perëndimorëve ka qenë ish-Prokurori i përgjithshëm i Shqipërisë, Adriatik Llalla, i cili u shpall non-grata nga SHBA në 14 shkurt të vitit 2018-të. Përveç përcaktimit të kryeprokurorit, në vendim ka sanksione edhe për bashkëshorten e tij, Ardjana Llalla, vajzën Eni dhe fëmijën tjetër të tij, shtetas joamerikanë”. Pak javë më pas, më 16 prill 2018, DASH do t’i ndalonte, me të njëjtin motivacion, hyrjen në SHBA, deputetit Tom Doshi bashkëshortes dhe fëmijëve të tij. Doshi dha dorëheqjen edhe nga kandidimi në zgjedhjet e 25 prillit pas mesazheve të vazhdueshme të ambasadores Yuri Kim.