Një lëvizje e rëndësishme ushtarake e Turqisë në bregdetin e Egjeut ka tërhequr vëmendjen e Greqisë. Brigada e 51-të Komando është zhvendosur disa kilometra nga bregu përballë ishullit grek të Samosit. Mediat turke e kanë lidhur këtë lëvizje me tensionet greko-turke, ndërsa një prej tyre raporton se në zonë janë vendosur rreth 2 mijë komandot profesionistë. Brigada e 51-të nuk është një formacion i krijuar rishtazi. Për dekada ajo ka qenë e vendosur në Turqinë lindore dhe është angazhuar në operacione në terrene të vështira. Njësia, e njohur më parë si Brigada e 51-të e Këmbësorisë së Sigurisë së Brendshme, u transformua zyrtarisht në Brigadë Komando në vitin 2018. Ajo ka marrë pjesë në operacione kundër grupit të armatosur kurd dhe, sipas raportimeve të mediave turke, edhe në operacionin “Dega e Ullirit” në Siri. Megjithatë, zhvendosja në Sokia nuk do të thotë se Turqia ka krijuar një forcë të re amfibe përballë ishujve grekë. Brigada e 51-të është një formacion i forcave tokësore dhe jo një njësi amfibe. Ministria turke e Mbrojtjes ka konfirmuar transferimin dhe ka sqaruar se ndryshimi i selisë së Brigadës së 51-të ishte miratuar që në qershor të vitit 2026, në përputhje me misionin dhe nevojat operacionale të Forcave të Armatosura Turke. Kjo do të thotë se vendimi nuk është marrë si reagim i menjëhershëm ndaj ndonjë zhvillimi të fundit grek, edhe pse prania e njësisë në Sokia është bërë publike që prej fundit të gushtit. Ndërkohë, pala greke po e monitoron nga afër zhvendosjen.