Korrespondenti i Huffington Post (hafington post), Shirish Date (Shirish Dejt) ka marrë një përgjigje që nuk e priste nga Shtëpia e Bardhë kur iu drejtua me pyetjen se kush e kishte zgjedhur Budapestin e Hungarisë për takimin e pritshëm mes Donald Trump dhe Vladimir Putin. ‘Nëna jote e zgjodhi’, ishte mesazhi që mori mbrapsht gazetari veteran i medias amerikane nga zëdhënësja e Shtëpisë së Bardhë, Karoline Leavitt (Karolin Livit). Të njëjtën përgjigje gazetarit ja përforcoi më vonë edhe Steven Cheung (Stiven Çung), Drejtori i Komunikimit në Shtëpinë e Bardhë, që ishte më konkret duke i thënë ‘nëna jote’. Gazetari iu kundërpërgjigj dy mesazheve të marra me pyetjen tjetër nëse zëdhënësve të Donald Trump i dukeshin për të qeshur përgjigjet që kthyen dhe këtë herë mori mbrapsht arsyet. Karoline Leavitt në një mesazh më të gjatë e akuzon atë si majtist të thekur që i thotë vetes gazetar i pavarur që nuk e besojnë as kolegët. ‘Asnjë nga kolegët e tu nuk të merr seriozisht në media, vetëm se nuk ta thonë në sy. Je një majtist! Mos më dërgo më pyetje të njëanshme, provokuese, të pandershme dhe budallallëqe’, i shkruan Leavitt. Gazetari Shirish Date, me origjinë indiane është kritikuar edhe nga vetë Presidenti Donald Trump, që e ka cilësuar si një ekstremist i majtë, pas disa shkrimeve të tij në lidhje me menaxhimin e pandemisë në fund të mandatit të parë të Trump dhe korrupsionin brenda Partisë Republikane.